रामजानकी बालिका आश्रमलाई सहयोग

लोककल्याण प्रतिष्ठान चितवनद्धारा सञ्चालित श्री  रामजानकी बालिका आश्रमले बालिकाहरुको गुरुकुल शिक्षाको लागि गरेको पहलको प्रदेश सांसद विजय सुवेदीले प्रशंसा गरेकाछन् । बालिकाहरु मात्र आश्रित आश्रम  समावेशी गुरुकुल शिक्षाको लागि उदाहरणीय बनेको उनको ठम्याई छ । बुधबार आश्रममा आयोजित सहयोग हस्तान्तरण कार्यक्रममा बोल्दै सांसद सुवेदीले बालआश्रमहरुले पुरा गर्नुपर्ने न्यूनतम आवश्यकता पुरा गर्न कठिनाई भए सरकारको ध्यानाकर्षण गराउन समेत सुझाएकाछन् ।सो क्रममा उनले पिस वेभ नेपाल चितवन  र लायन्स क्लव अफ काठमाण्डौं टेम्पलले उपलब्ध गराएको  दुई लाख रुपैंया आर्थिक सहयोग आश्रमका आमा सावित्री टण्डनलाई हस्तान्तरण गरेकाछन् । आश्रममा रहेका ४० जना बालिकाहरुको विद्यालय पोशाक तथा स्टेशनरी खर्च शिर्षकमा सो सहयोग जुटेको हो । पिस वेभ नेपाल चितवनले स्टेशनरी व्यवस्थापनका लागि एक लाख र लायन्स क्लव अफ काठमाण्डौं टेम्पलले पोशाकको लागि एक लाख रुपैंया सहयोग गरेको हो । दुवै संस्थाले आगामी ५ वर्षका लागि प्रत्यक वर्ष १ लाखका दरले सहयोग गर्ने प्रतिवद्धता जनाएको लोककल्याणकारी प्रतिष्ठान चितवनका महासचिव रामेश्वर खनालले बताए । आश्रममा शिशु कक्षा देखि ११ कक्षा सम्म अध्ययन गर्ने बालिकाहरु आश्रित छन् ।आश्रम सञ्चालनका लागि प्रत्यक महिना न्यूनतम एक लाख रुपैंया खर्च हुने सचिव खनालले बताए । विभिन्न सहयोगि संस्थारुबाट जुट्ने सहयोग नै आश्रम सञ्चालनको मुख्य स्रोत रहेको उनले बताए । कार्यक्रममा नेपाल जेसिजका पूर्व केन्द्रिय अध्यक्ष महेश दाहाल, पिस वेभ नेपाल चितवन का अध्यक्ष अरुण कुमार श्रेष्ठ, , लायन्स क्लव अफ काठमाण्डौं टेम्पलका सुदर्शन  महर्जनले मन्तव्य दिएका थिए